| |
| Li rojavayê Kurdistanê çi heye? |
| 2015-12-24 21:08 |
|
|
Teviya Sûriyê bûye goleke xwînê, tê de bi bombeyên Ûrisan û
bi bermîlên teqînok ên leşkerê Esed, bi sedan zarok, jin,
mirovên bê çek û deban, her roj tên sotandin û di bin xanî û
malên herifandî de tên çalkirin. Lê belê, ne Esed û ne jî Putîn
yek bombe jî bi ser YPG û Asayîşa PYD de navêjin, eve nîşana çî
ye? Eger rast evana hêzekin ji hêzên şorişa Sûrî, bo çi deselata
Esed van wilo bê lêdan dihêle, di demekê de, ew hemî
hembervanên xwe, çi Demokrat û çi Islamî, wekî hêzin têrorî
dide nasdan û li gor wê nasdanê wan tevan bombe dike, û
gava kesekî ji wan hêzan digire, bê wijdan, bê mirovatî û bê
dilovanî wan dikuje. Tenha PYD û saziyêd wê wekî hêzeke dost
ji xwe re dibîne. Ma eve ji me Kurdan re û ji hêzên demokrat
ên gelê me re, di rojên pêş de, baş e an ne? Eger şorişa Sûrî bi
ser ket, wê rewşa van hêzên ku Esed-Dost çewa be?
PYD û saziyên di bin saya wê de li Rojavayê Kurdistanê çi dikin?
Bê guman Grîllayên wan berxwedaneke qehremanî li hember
DAISH dane û didin xuyakirin, teviya cîhanê û em Kurd jî bi vê
yekê serbilind in, lê evana ne tenê li hember DAISH in, belku li
hember teviya hêzên demorat ên gelê xwe ne jî.
Bo nimûne: Girtin û kuştina kadro û rêberên ENKS,
berbestkirina (qedexekirina) Alaya neteweyî ya gelê Kurd, ku
alaya şoriş û serhildanên gelê me ye, ji sala 1919ê de, dema
Rewşenbîrên Kurd li bakurê Kurdistanê xwestine komeleyeke
bo paristina çanda kurdî ava bikin, ev al ji xwe re hilbijartine.
Di vê yekê de guman nîne. Li ser çiyayê Agirî (1937), di ser
milên Pêşewa Qazî Mihemed re li Mahabad (1946), di şorişa
mezin de (1961-1975), û bo her part û rêkxiraweke kurdî /
Kurdistanî ev al hatiye pejirandin, PKK bi xwe jî di civîneke
kurdistanî ya fireh de ev al erê kiriye. Dewleta Iraqê
pejirandiye, ku li teviya herêma başûrê Kurdistanê ev al li
tenişta ala Iraqî têye hildan. Li teviya cîhanê, ne tenha sazî û
mirovên Kurd, belku dewlet jî ala me ya neteweyî, roj bi roj
dipejirînin. Heta carina hinde neyar jî, lê tenha PYD, ku
fermana xwe ji PKK dibe, li hember ala me derdikeve û hêriş
ser rêveçûnan dike, bo ku hildana wê berbest bike.
PYD, ku piraniya gelê me ji ber deselata wê, ya ji deselata
Baasiyan tarîtir e, direve, û xortên me, ji ber siyaseta wê ya
çewt, bi sed hezaran gihane Ewrûpa, ne tenê dijî ala
Kurdistanê ye, ew li hinek deveran nahêle harîkariyên „Weqfa
Barzanî“, ku weqfeke xêrê ye, derbas bibin nêv gel, ji ber ku
wêneyê nemir Mustafa Barzanî li ser kartonan e. Ew dibêje
navê Barzanî rakin, em ê bihêlin harîkarî derbas bibe û divê
hûn lîsteyekê bidin me, ka hûn ji kê re belav dikin.
Bêguman neyartiya rêberekî wêrek û fedekar mîna nemir
Mustafa Barzanî, ku wekî wî di nêv teviya gelên Rojhilat de
rêber nînîn, neyartiya gelê Kurdistan e.
PYD, dêrîna gelê me, çi genim, çi zeytûn û çi petrol, ji xwe re
helal kiriye, bi gelek şêweyan dest datîne ser malê xelkê, ku ji
zû ve hatiye hejarkirin, û bi teherekî nenas wan hatinên diravî
bincil dike, ku gel tiştekî li ser nizane û nabihîse.
PYD rê dide Baasiyan, saziyên ciwanên Baasî, hêzên êlên Ereb,
ku bavê Beşar Esed ewana bi zorê anî bûn herêma Cezîrê, bi
mebesta guhartina dêmografiya wê, lê belê nahêle
pêşmergeyên „Leşkerî Roj“ bên war û cihên xwe, ku Kurdên
Sûrî ne û li ser destê birayêd xwe li başûrê Kurdistanê fêr
bûne, û bi ser de jî PYD gef û gerran dide û dibêje: „Eger
Leşkerî Roj bite Rojava, em ê bi wan re di şer kevin!“ Birano,
hûn vê çewa dinirxînin binirxînin, ez vê helwêstê mîna „dij-
Kurd“ dibînim.
Şerîf Şehatte, ku endamekî „Encumena gel“ a deselata Esed e,
berî niha bi çend rojan li ber televîsiyonê, bi aşkeryeî got, ku
PYD û saziyêd wê parek ji sîstema fermî û ji leşkerê Erebî Sûrî
ne, ewana dikarin bi çekên xwe bên Şamê, ji ber ku hevbendên
me ne, em dostên hevin û bi hev re li dijî têrorê dixebitin. Berî
wî kesê dûvik, Beşar Esed bi xwe jî gotibû.“Em harîkariya PYD
bi her şêweyekî dikin.“
Hêrişa siyasî ya PYD, ne li ser deselata Esed e, ew li ser Itîlafa
hêzên şoriş û hembervaniya Sûrî ye, li ser ENKS ye û li ser
serok Masûd Barzanî ye, bi ser de jî ew serok Barzanî ji bo
komkujiya Til Temir tawanbar dike û hîn salek derbas nebû ye,
di ser piştvaniya wî re ji bo rizgarkirina Kobanê, ku pêşmerge
hinartin û harîkariya PYD kirin. Qey eve bihayê wê biratiyê ye?
Hemî gotin ên mezinên „Deselata Demokratî“ ya
„Nedemokrat“, ku tê de yek peyv li ser Kurd û Kurdistanê
nayên kirin, hêrişin dirinde û ters in, li ser tevgera neteweyî ya
demokrat a Sûrî û Kurdistanî. Ma ev siyaset heta kijan pileyê
dikeve berdestiya gelê me?
PYD, li ciyê „Rojavayê Kurdistan“, tenha peyva „Rojava“ bi kar
tîne, li ciyê alaya kurdî ala Lîtwaniya hildide, li ciyê Pêşmerge
„Girîlla“ bi nav dike, li ciyê „Mafê gelê Kurd“, serekên êlên
Ereb, ku hinek ji wan amade ne bi xwîna Kurdan destnimêja
xwe bikin, tîne ba xwe, çekan dide wan û wan dike
deselatdarên îdareya xwe canbaz, lê siyasetmendên Kurd
digire û davêje zindanan, an herroj wan dixîne metrsiya
kuştinê.
Gelo, ma çi kar ji van karan „demokrat“e heta ku navê xwe
kirine Partiya Yekîtiya Demokrat?
Bila rewşenbîrên me li bakurê Kurdistanê bi wijdan li vê
tabloya reş temaşa bikin û gotina xwe li ser wê bibêjin.
Cankurd |
|