| |
| Lîsta Goran û opozisyon |
| 2009-08-24 09:05 |
Nasrat Hacî
info@mediakurd.com |
|
Eger em realîteya civaka xwe baş bizanin, bi çavê wê realîteyê li meselan binêrin û şirovan li ser bûyerên diqewimin bikin, wê demê em di rexneyên xwe de û di analîzekirinên xwe de li ser bûyerên li Kurdistanê rûdidin şaşiyên mezin nakin û wê rexne û analîzên me jî pêtir realîst bin, cihê baweriya xwendevanan bin.
Werin em di vê çarçovê de, van çend rêzên li jor li ser lîsta Goran tetbîq bikin, bi çavekî rêalîst vekolînê li ser lîsta Goran bikin. Gelo ew lîste bi vê eqliyeta xwe dikare li beşûrê Kurdistanê di parlamentoyê de bibe opozisyon?
1-Serokê lîsta Goran Newşêrwan Mistefa weke kesê duyem di nav Yekêtîya Niştimanîya Kurdistanê YNKê de berpirsiyarîya wî jî di hemû bûyerên Kurdistanê de heye. Wî roleke mezin di şerê hemû partîyên Kurdistana başûr de lîztiye û heta nûke ew helwesta xwe diyar nekiriye ka gelo ew her bi wan bûyeran re ye yan helwesta xwe guhertiye û poşman bûye. Ger mirov guhertinê bike, gereke yekem pêngav ji xwe destpê bike, xwe biguhere û paşê ji bo guhertina derdora xwe bixebite. Meselek Kurdan heye dibêje: "Filehê pîr misilman nabe!"
2-Serokê Lîsteya Goranê bi hinceta wê yekê ku partiyên desthilatdar PDK û YNK û hikûmeta herêma Kurdistanê hemû gemdelin û ew hatiye şerê gendeliyê bike, lê di vê em ji bîr nekin ku hêşta Newşêrwan Mistefa endamê serkotîya YNK-ê ye û wî bi fermî îstîqala xwe ji YNK nedaye. Ji ber hindê, li gor dîtina Mistefa bo patirên desthilatdar, ew jî gendeliya Kurdistanê berpirs e.
3-Wî ji bo damezrandina kompaniya Wşe pere ji sekreterê YNKê (serokkomarê Îraqê) û serokê PDKê (serokê herêma Kurdistanê) wergirtiye. Eger li gor hisabê lîsta Goranê be, ku herêma Kurdistanê serûbin gendelî ye, bi vî awayî kompaniya Wşe û telefizyona KNN ya ser bi Newşêran ve jî beşek ji gendeliya Kurdistanê ne.
4-Heta roja îro jî Goran xwe weke partiyek siyasî îlan nekiriye. Gelo pirogram, îdeolojî û karnameya wê ji bo baştirkirina jiyana xelkê herêma Kurdistanê çiye? Gelo wê îdolojîyek netewî heye? Ew ji bo parçên din ên Kurdistanê çi difikire? Felsefeya wê bo îdarekirina hikûmetê çiye? Bersiva van pirsa nîne.
5-Newşêrwan Mistefa û hevalên wî li ser esasê cudahîya îdolojî, li ser awayê sîstema îdarekirina hikûmeta herêma Kurdistanê û li ser esasê dijî gendeliyê ji YNK neveqetiyaye, ew li ser esasê kêşe û nakokîyên şexsî û ji ber peymana stratejîk a YNKê bi KDPê re ji YNK dûr ketiye.
6-Lîsta Goran grûpek lokal e û ew nikare temsîla hemû herêma Kurdistanê bike. Li devera Badînan kesên teîda wan dikin bi tilîyên destan tên jimartin.
7-Ew daxuyanî û helwestên dujmin û nahezên Kurd li hember herêma Kurdistanê didin û serokatiya herêma Kurdistanê gunehbar dikin. Goran jî her eynî wan daxuyaniyan û helwestan li hember herêma Kurdistanê bikar tîne. Ango, bi kurtî û Kirmancî, stratejîyek netewî nîne.
Gelek kesan û bi taybetî xelkê derdora Lîsteya Goranê rexne li helwestên hikûmeta herêma Kurdistanê û partiyên desthilatdar digirt ku ew di helwestên xwe de beramber Amerîkîyan sist û gelek nerm in. Dihat gotin ku partiyên desthilatdar di bicîhkirina madeya 140ê û vegerandina deverên veqetyayî bo ser îdareya herêma Kurdistanê de ne cidî ne. Dema lîsta Goran di hilbijartinan de 25 kursiyên parlamentoya Kurdistanê wergirtin, gelek kêfa wan kesên wisa difikirîn hat qaşo Goran wê bibe hêzek opozisyon û helwestên wê ji yên partiyên desthilatdar hişktir bin. Lê mixabin wisa derneket, her zû eşkere bû ku lîsta Goran ne ji bo ku bibe hêzek opozisyon hatiye meydana siyasî. Ew ji ber hindek kêşe û nakokîyên navxweyî yên YNKê û ji bona wergirtina serokatîya YNKê, ew ji YNKê dûr ketine.
Di yekem daxuyanîya xwe de Newşêrwan got: “Parastina xak û yekparçeyîya Îraqê ji vegerandina Kerkûkê bo ser herêma Kurdistanê giringtir e.”
Helbet sovenên Ereb jî û yên li dijî destkeftên herêma Kurdistanê jî hemû wek Newşêrwan difikirin. Piştî vê daxuyanîya Newşêrwan, yekser berpirsekî Bereyê Turkmenan pêşwazî li daxuyanîya Newşêrwan kir û got ku helwestên Newşêrwan nerm in û di xizmeta paraztina yekêtiya Îraqê de ne.
Ya duyê jî dema şandeya Amerîkayê ya bi serokatîya senator John McCain li Hewlêrê bi lîsteya Goran re civîya, xelkê wisa hizir dikir, ya ku çend salan partiyên desthilatdar ji Amerîkayê re negotiye vaye lîsteya Goran wê ji wan re bêje û wê guhê Amerîkîyan bikêşe. Lê mixabin, piştî civînê kesê duyê di lîsteya Goran de û zavayê Newşêrwanî, Mihemed Tewfîq ji mediyayê re got:” Mijara sereke ya me bi Amerîkîyan re minaqeşe kir, meseleya sextekarîya hilbijartinan bû.”
Weke piraniya karên Kurdan, mixabin opozisyon jî li Kurdistanê şaş ji dayik bû, beravêtî bû. Lîsta Goran ne wek hêzek opozisyon a xwedî acende û armanc hatiye nav meydana xebata siyayî. Ew ji bo bidestveanîna hindek berjewendiyên şexsî çêbûye û ew verêja nav YNKê ye.
Bi dîtina min Newşêrwan Mistefa, di vê dewra parlamentoya Kurdistanê de nikare rola opozisyonê bilîze. Ji sergêjiyê zêdetir tiştekî din bo hikûmeta herêma Kurdistanê nake.
Nasrat Hacî
18.8.2009
jêder: rojevakurd.com |
|